16th December 2012 issue

A TAWPAH ENGNGE I SAWI VE DAWN?

(Hebrai 9:27)

   
       Khawvela kan cham chhung hian mahni nihna aia lan mawi hi kan duh vek a, kan nihna chiah hi chu kan puang chhuak duh mang lo va. Kan rilru ang lo takin kan tawng chhuak a, kan tawngkamin kan nihna tak chu kan hâi khuh a. Hetiang lemchang nun hi a tak chan a tul phut hunah a buaithlak duh phian thin a ni. Chutih laiin rilru ang tak leh mahni nihna dik tak sawi nulh nulh hi chu mi â tiin kan dem hlauh thung a. A dik tak chuan a derin kan nung a, lem chang thiam thiam hi kan ngaisang emaw tih mai tur a ni a. Mahni nihna dik tak zahpui lova nungte hi chu kan ngaisang vak hauh lo va, chawimawina Nopui phei chu kan dawmtir reng reng lo. Hei hi khawvel hrehawmna pakhat chu a ni ngei mai. Tunlai khawvel buaipui pakhat chu lemchan hi a ni a, a tak en peih mang si lo hian a lem chu kan en peih hle si a nih hi.

        Kan thih dawn darkarah chuan lemchang nun hi a bo vek tawh ang a, a takin kan nung tan tawh ang. Kan khum bulah chhung khat laina an inpun khawm rap rap ang a, "Mate, fian khat tal hi i la lem thei lo maw ?" min tih laih laih hunah chuan kan rilru leh kan nun dan chu a inmil thlap tawh ang. Chumi hunah meuh chuan chhandamna la chang lo kha a derin a thlamuang thei tawh dawn hauh lo va, a chang tawh lah chuan a hlau der thei hek lo vang a, tu nge ka nih tih chu a chiang tawh ang. Engtik niah emaw chuan thihna hian kan nun hi a la pawt chat ve dawn a, chumi hunah chuan kan thusawi tawp berah eng thu nge kan sawi ve ang? Chuta kan thusawi tur chu dâwt a tel thei tawh dawn lo va, Pathian leh mihring pawm tlak thu dik a ni hlen tawh ang. Chutiang thu dik chu kan sawi thut dawn avangin thu dik hlauhawm nge kan sawi dawn, thu dik lawmawm? Kan natna khum bulah chhung khat lainaten mittui parawl teuhva min en thap hunah chuan thu dik kan sawi hun a thleng tawh ang.

9th December 2012 Issue

                                              KRISMAS  THUCHAH                     - R. Zathuama

Khawvela mi sang tam takten an hmuh ve phak loh  kum 2012 Krismas chu kan lo hnaih leh ta hle mai. Tun ang hunte thleng theia Pathianin kan nunna min la zuah avang pawh hian Pathian hnenah  lawmthu sawi ila. Kan hma lawka Krismas lo thleng tur atana kan inbuatsaihna atan Krismas  thuchah tawi te  i han sawi teh ang.
    Hmanlai atanga vawiin thleng hian he Krismas hi khawvel hian kan lawmin kan buaipui luai luai mai chu a ni a. A lawm nan neih zawng zawng sengin kan  inbuatsaih a. A nei tam an inseng tam a, a nei tlem an in seng tlem mai zawng a nia le! Kan mithiam ten  min hrilh danin  tunah tak phei chuan he Krismas hi  khawvel pumpui  hian an hmangin an serh tawh a, hmun thenkhatah phei chuan Kristian  ni ve lote pawh a uar hlei hleiah an tang a ni awm e. Bethlehem-a nausen pakhat lo piangin hetiang tak maia khawvel a nghawr nghin theih dan em em hi eng vang nge ni ang tih hi kan Bible atangin i lo thlir nawn leh teh ang u.
    He Chrismas neitu Lal Isua  Krista hi a lo pian hma daih atangin a chanchin Zawlneiten  an lo hmuin an lo puang tawh thin a. Zawlnei Isaia pawh khan a lo pian hma kum 700 lai atanga lo hmulawkin he naupang lo piang tura hi - Riangvaite hnena Chanchin Tha hril tur leh Thinlung lungchhiate tuam dam turte, salte hnena chhuahna thu leh mitangte hnena tan in hawnna thu sawi tur te, Lalpa lungawi kum thu leh kan Pathian phuba lakna ni sawi tur te, Lungngai zawng zawngte thlamuan tura Pathianin a rawn tirh a nih thu min hrilh a (Isaia 61:1-3).

Dt 2nd Dec 2012 issue

BIBLE SOCIETY PAWIMAWHNA
Rev. B. Thangchina

Bible Society pawimawhna hi thlir zau lovin Mizoram Kohhrante leh Mizo mipuite tan pawh a pawimawhzia a tlangpuiin i ngaihtuahho ang u.

    1. Kohhranhote tan a pawimawh :  Mita hmuh theih hmanruaah chuan kohhranhote tana pawimawh ber chu Bible hi a ni i ti tawp mai ang. Ringtu mimal leh chhungkaw tana pawimawh ber pawh Bible hi a ni a. Lal Isua ngei pawhin Bible hmangin Setana a hneh a, Tirhkoh Paula pawhin ‘Thlarau ngunhnam Pathian thu’ a ti a. Tunlai tawng chuan silaimu an ti reng a ni.  Missionary-te hian a pawimawhzia an hrechiang a, Bible letling hmasa leh letlingtu tam berte chu Missionary-te an ni. 
    Mizo tawng pawhin kum 1895 khan Sap Upa leh Pu Buanga te chuan an let tan a, kum 1898-ah Bible Society-in London-ah Chanchin Tha Luka leh Johana an chhu a, chu chu Mizo tawnga kan neih hmasak ber a ni. Kum 1899-ah Tirhkohte Thiltih an chhu leh a, New Testament kum 1926 ah min chhutsak leh a. Kum 1959-ah phei chuan Bible pumpui min lo chhutsakin tlangzarh (released) a ni ta a. Revised Edition te, Study Bible te thlengin chi hrang hrang min chhutsak ta a. Chuvangin Bible Society hi  Kohhran mamawh ber min supply-tu a ni a, ngaihhlut tur leh ngaih pawimawh hle tur a ni. Kohhran tan a tangkai em avang hian ‘Kohhran chhiahhlawh a ni e’ an ti fo reng a ni.