9th December 2012 Issue

                                              KRISMAS  THUCHAH                     - R. Zathuama

Khawvela mi sang tam takten an hmuh ve phak loh  kum 2012 Krismas chu kan lo hnaih leh ta hle mai. Tun ang hunte thleng theia Pathianin kan nunna min la zuah avang pawh hian Pathian hnenah  lawmthu sawi ila. Kan hma lawka Krismas lo thleng tur atana kan inbuatsaihna atan Krismas  thuchah tawi te  i han sawi teh ang.
    Hmanlai atanga vawiin thleng hian he Krismas hi khawvel hian kan lawmin kan buaipui luai luai mai chu a ni a. A lawm nan neih zawng zawng sengin kan  inbuatsaih a. A nei tam an inseng tam a, a nei tlem an in seng tlem mai zawng a nia le! Kan mithiam ten  min hrilh danin  tunah tak phei chuan he Krismas hi  khawvel pumpui  hian an hmangin an serh tawh a, hmun thenkhatah phei chuan Kristian  ni ve lote pawh a uar hlei hleiah an tang a ni awm e. Bethlehem-a nausen pakhat lo piangin hetiang tak maia khawvel a nghawr nghin theih dan em em hi eng vang nge ni ang tih hi kan Bible atangin i lo thlir nawn leh teh ang u.
    He Chrismas neitu Lal Isua  Krista hi a lo pian hma daih atangin a chanchin Zawlneiten  an lo hmuin an lo puang tawh thin a. Zawlnei Isaia pawh khan a lo pian hma kum 700 lai atanga lo hmulawkin he naupang lo piang tura hi - Riangvaite hnena Chanchin Tha hril tur leh Thinlung lungchhiate tuam dam turte, salte hnena chhuahna thu leh mitangte hnena tan in hawnna thu sawi tur te, Lalpa lungawi kum thu leh kan Pathian phuba lakna ni sawi tur te, Lungngai zawng zawngte thlamuan tura Pathianin a rawn tirh a nih thu min hrilh a (Isaia 61:1-3).


    Amah Lal Isua ngei pawh khan, ‘He mi chungchang  Zawlnei Isaian  a lo sawilawk kha  a takin in hnenah a lo thleng ta a nih hi,' tiin; he khawvela a lo kal chhan chu Nazareth  khuaa Inkhawmna inah khan a rawn puang chhuak leh ta bawk a (9Luka 4:21). He khawvela a tisa put lai niah pawh khan a hun zawng zawng chu a rawn kal chhan Chanchin Tha hrilh nan hian a hmang zo vek a. In leh lo pawh nei ve lovin Galilee ram dung leh vang a fang vel a. He a hna atan hian inhmang ral thakin khawvel tan a Nunna a rawn pe ta a. Chumi  a thihna avang chuan Zawlneite lo sawi lawk tawh angin Thlarau sal tangte an chhuak a, mitdelten mitvarna hmuin Pachhiate pawhin  Chanchin Tha chu an dawng a; Lei leh Van pawh an lo inrem leh ta a ni.
    Baptistu Johanan Tan In chhung atanga zawhna  pawimawh tak, "Lokal tura chu i ni nge midang kan la ngai ang?" tia ava zawh pawh khan Lal Isuan  he khawvela a rawn kal chhan Taksa leh Thlarau damna hna a thawh mek zel thua lo chhangin, "Tupawh ka chunga lungnih lohna hmu lo chu an eng a thawl e" tiin a lo hrilh a nih kha (Luka 7:20-23).
    Awle, kum tina khawvelin a hman leh a serh thinna chhan, he Krismas ropuina ber chu Krismas neitu  Lal Isua Krista Khawvel nghahfak, boralte chhandam tura Pathian mihringa a lo channa ni a nih avang a lo ni a. He ni ropui tak kan hmaa lo thleng tur hi kan tan a hluin ava ropui em! He ni ropui lawm tura kan inbuatsaihnaah pawh hian he Krismas hlutzia leh ropuizia hrerengin Thlarau lam thil hnuchhawn a, hlimhlawp leh nawmchen nan maia hmang lovin Bethlehem lam hawi ila; kan tana Lal thar lo pianga chu kan thinlung robawmte hawngin chibai i buk ve ang u.



WORSHIP  PROGRAMME 
Pathianni zing        :  Upa Lalrinliana Colbert
Pathianni zan        :  Upa Vanlalzara Sailo
Damdawi in        :  Upa C. Zirkunga
Nilai zan  (12.12.12)    :  Rbt. Joseph Lalhimpuia 
Inrinni zan (15.12.12)    :  Rbt. Zosangliana Murray



Sunday School Report (as on 2.12.2012)
Zirlai hming ziak zat             :      1138   
Zirtirtu zat                           :    104   
Hming ziak zawng zawng    :    1242   
Hming ziak percent             :    67.31%   
Kai zat                               :    756   
Kai percent                        :     60.87 %  
Thawhlawm                       :    Rs. 5127.00   


BMP HUANG

FELLOWSHIP PROGRAMME
A hun            : 9th December, 2012 @ 1:30 PM
A hmun         : Fellowship Hall
Hruaitu          : Pu PC. Lalrintluanga
Thuzir            : Zirlai 10-na


 LAWMTHU
Kan member chatuan ram min pansan ta Pu K. Selhranga hriatreng nan, a nupui Pi Lawmi leh a faten Steel Almirah tha tak Rs.14000/- man lai chu  kan Unit BMP tan an donate a, an chungah BMP te kan lawm tak meuh a ni. Lalpa’n malsawmna tam takin vur se tih kan duhin kan dilpui bawk a ni.


    FELLOWSHIP PROGRAMME
A hun        : 9th December, 2012 @ 1:30 PM
A hmun         : Fellowship Hall
Hruaitu          : Pu PC. Lalrintluanga
Thuzir         : Zirlai 10-na

BENCH RAWNG HNAWIH HNATLANG
Kohhran Committee-in min beisei angin  inhlawhfaa kan bench siam sa 70 te chu Dt. 15.12.2012 (Sat) hian rawng hnawih hnatlang BMP-ten thawh tur a ni. Hnawih tur a tam tham deuh avangin BMP member tam thei ang ber thawh chhuah i tum ang u. Biak in kawtah hnawih tur a ni e.

HRUAITU  INTHLAN
Dt. 16.12.2012 (Sunday) inkhawm banah kum 2013 chhunga BMP Chanmari Unit hruaitu tur thlanna Fellowship Hall-ah neih a ni dawn. Inthlannaah hian member zawng zawngte tel theuh i tum ang u.

ADVANCE CHRISTMAS
A hnuaia programme tarlan ang hian BMP Chanmari Unit  chuan Advance Christmas hlimawm tak hman a tum a,  member zawng zawngte tel vek i tum ang u :
    A hun    :  14.12.2012 (Friday) 6:30 PM
    A hmun    :  Fellowship Hall.
    Hruaitu    :  Pu K. Lalrochhunga, President
    Thawhlawm khawntu :  Pu MC. Thansiama
    Thuchah tawi    :  Upa R. Zaichhuana, Sr. Adviser.
    Sharing    :  A duh apiang tan
    Gift Exchange i/c    :  Pu PC. Lalhmingmawia & PC. Lalrintluanga
[Note : i) Gift Exchange tur hi Rs. 50 aia tlawm lo leh Rs. 100 aia to lo ni se, ii) Sawhchiar leh thingpui tui tak buatsaih a ni ang  iii) A tam thei ang ber zaiho a ni bawk ang]

 WEBSITE  NEI  THAR
BMP Chanmari Unit chuan Website thar kan nei ta. BMP Entu Chanchinbua thuchhuahte Internet-a lo chhiar duh tan www.bmpentu.blogspot.com ah en theih reng a ni e.


                                      MISSION BUHTHAR HLAN NI
                                             9th December, 2012

     Vawiin hi BCM chuan Mission Buhthar Hlan Ni atan a ruat a, Kohhran ni pawimawh a ni. BCM Hqrs. chuan Inkhawm tawngtairual thupui atan hengte hi a ruat :  1) Pathian hnen ata malsawmna kawng hrang hranga kan dawn avang leh buh thar hlan tur leh thil pek tur malsawmna kan dawn avangin lawmthu sawi ila,  2) Keimahni leh kan thilpek leh buh tharte a hnenah hlan ila,  3) Kohhran mipuiten Mission rawngbawlna kan ngaih pawimawh zel theih nan Thlarau Thianghlim tihharhna dil ila.
      Mizoram Baptist Kohhran chuan kum 1939 atangin Tuikuk-Takam zinga rawngbawl hna a tan a. Chumi hnuah Zoram Baptist Mission  (ZBM) din a lo ni leh a. Ramthim rawngbawlna lamah kohhran mipui kan thanharh zel avangin kum 1984 Assembly chuan ZBM rawngbawlna lama hma kan sawna thilpek a lo pun beiseiin “ZBM Buh Thar Hlan Ni” atan a lo ruat ta a. Kum 2005 Assembly thleng khan ZBM Buh Thar Hlan Ni thawhlawm pawh Headquarter-ah chhunluh a ni. Mahse hun lo kal zelah rawngbawl dan ko thlak a lo ni ve zel a, ZBM Buh Thar Hlan Ni chu “Mission Buh Thar Hlan Ni” tih a lo ni ta a.Tichuan hemi nia pawisa tlingkhawm pawh hi Headquarter-ah chhunglut tawh lovin ‘Tualchhung kohhran rawngbawlna atan hman ni se’ tiin kum 2005 Assembly chuan a lo rel leh ta a. Vawiin thlengin December Pathianni vawi hnihna hi Mission buh thar hlan ni atan hmangin thawhlawm pawh Tualchhung kohhranin a chang ta zel a ni.


                                   TUALCHHUNG KOHHRAN THU LEH HLA
@ Vawiin hian Sunday School exam result tarchhuah a ni dawn a, lawmman chu karleh Sunday-ah  sem a ni ang. Hengahte hian lawmman pek a ni dawn : 1) SS hming ziak kum 70 chin chunglam,  2) Honour - 85 mark hmu chin,  3) Kai kim,  4)  Kai tha - vawi 3 kai lo chin, 5) Chhungkuaa hming ziak.

@ Missionary-te tan Missionary Tlangau chanchinbu laksak thei kan awm a nih chuan Kohhran Secretary Upa Vanlalzara Sailo hnenah a hma lama in-report tur a ni e. Kum khat lak man Rs 50/- (sawmnga) chauh a ni e. Mi ssionary pakhat aia tam tanah pawh laksak theih reng a ni.

@ Ni16.12.2012 Pathianni zing atanga ni 23.12.2012 Pathianni zan thleng kan Kohhranah Crusade neih a ni dawn a, Speaker atan Upa B. Lalthanliana, Gospel Messenger Team hman a ni dawn. He Crusade hian rah tha duhawm tak a chhuah theih nan leh kohhranten kan hlawkpui ngei theih nan Pathian hnenah i dil thin ang u.
@ Nimin nileng khan BKHP Chanmari Unit  te chuan Unit pum huap Fellowship hlimawm tak an hmang a, tlai lamah ruai tuhnai tak, puar takin an theh. Fellowship programme hi chawhma leh chawhnu huna then a ni a, Special item hlimawm tak Rbt. H. Lianchhungi bakah Pi Lalrothangi Sailo leh a pawlten an hmang.  Outdoor Games hmuhnawm tak - Musical Chair leh Kawi Inkahsiak te an ti bawk. He Fellowship programme-a tel ten hlimawm an tiin hlawkthlak an ti hle.

MISSION NEWS

Missionary  Furlough :  1) December 2012 hian Pu K. Lalzuimawia, Evan. Yingkiong, Arunachal East Field te chhungkua chuan an awmna  Rahsiveng Bialah Furlough Programme an hmang chhunzawm.  2) December 6-9, 2012 hian Dr. Remsangpuia te nupa, China-a kan Missionary te chuan Hnahthial ‘N’ Bialah furlough programme an hmang.

Work Camp :  1) Dec. 3-8, 2012 khan Serte Kohhran member 20 chuan Zero, Tuichawng Chakma kohhran tan thutthleng an siamsak. 2) Mualthuam ‘S’ Kohhran chuan Thanzamasora-a Chakma Biak in sakna tur thing an zaipui mek. An inpekna a ropui hle mai.

Ringthar Baptisma chang :  1) Dec. 2, 2012  Pathianni khan Tuichawng Chakma ringthar 21 leh Kristian ni tawh sa 5, an vaiin mi 26 ten Baptisma an chang. 2) December, 2012 Pathianni khan Kalakhal, Cachar District, Assam-ah Bru hnam, Hindu sakhaw bia, Kristiana inlet thar mi 81 laiin Baptisma an chang. Lawmthu i sawi ang u.

Missionary nupui nei :  Dec. 13, 2012 hian Tv. F. Lalhmuchhuaka, Music Teacher, Seppa, Arunachal West Field chuan an kohhran Thiltlang Biak inah Nl. Lalropuii, Bualte chu Dan puitlingin a nei dawn. BCM-a a thawhpuiten an lawmpuiin duhsakna sang ber an hlan a ni.

Salvation Camp : 1) Lunglei Bazar Kohhran chuan Bru Baptist Kohhran, Chawngtelui chu Salvation Camp an neihpui mek.  2) Nimin Dec. 8, 2012 atang khan Zohnuai Kohhran chuan Bru Baptist Kohhran, Nghalimlui chu Camp an neihpui.  3) Dec. 18, 2012 atang hian Dulukma (Jamatia) kohhran chuan Salvation Camp an nei dawn. He Camp senso hi Lunglawn Kohhranin an tumsak dawn a ni. Camp hlawhtling tak an neih theih nan thahnemngai takin i tawngtaipui ang u.

Missionary damlote :  Heng kan Missionary damlote tan hian Pathian tihdamna leh awmpuina i dilsak ang u : 1) Pi Lalchhandami, ET, ZBMS, Birpar - naupai, rilphir zaina a la dam lo  2) Tv. Lalfamkima, Music Teacher, Naharlagun - Motor accident avanga ke hliam, an in Lunglei Chanmari Pastor quarter-ah enkawl mek a ni  3) Nl. F. Zoramthangi - cancer vangin Guwahati damdawiinah enkawl mek a ni.  4) Pu H. Laltlankima - CMC Vellore-ah enkawl mek  5) Pu C. Lalkthawmliana, Evan. Tuidu, S. Tripura - Malaria PF-in a damlo. 6) Rev. Lalfakzuala Hrahsel, Indonesia - khawsik vanga damdawiina awm.

Non-Mizo Evangelist-te rawngbawlna :  Dec. 6, 2012 atang hian Non-Mizo Evan. 4 (pali) chuan Darzo leh S. Vanlaiphai inkar Labour Camp-ah Crusade an tan dawn. Hetiang hian a huhovin rawng an bawl thin a, Thlarau Thianghlim thiltihtheihna nen nung taka Pathian thu an puan theih nan i tawngtaisak ang u.

Indonesia report : Indonesia-a kan Missionary-te chuan an tawng an zir thiam thawkhat ta a, Rev. Lalfakzuala chuan  bawlhhlawh leithaa siamna (Emission Reduction Company) hna hmangin Muslim sakhaw biate zingah rawngbawl tan a tum ta. A nupui Esther C. Lalhmachhuani pawhin an thenawm hnaia tleirawlte Saptawng leh an zirlai dangte zirtirin rawng a bawl tan ve mek bawk a ni. I tawngtaipui ang u.

***   Bible hi a nung a, ka hnenah thu a sawi thin. Ke a nei a, ka hnungah a kal zel thin; kut a nei a, min chelh reng thin.            - Martin Luther

***    Bible chhiar tha peih lo zingah Kristian hman tlak tak an vang duh hle.        - DL. Moody