A TAWPAH ENGNGE I SAWI VE DAWN?
(Hebrai 9:27)
Khawvela kan cham chhung hian mahni nihna aia lan mawi hi kan duh vek a, kan nihna chiah hi chu kan puang chhuak duh mang lo va. Kan rilru ang lo takin kan tawng chhuak a, kan tawngkamin kan nihna tak chu kan hâi khuh a. Hetiang lemchang nun hi a tak chan a tul phut hunah a buaithlak duh phian thin a ni. Chutih laiin rilru ang tak leh mahni nihna dik tak sawi nulh nulh hi chu mi â tiin kan dem hlauh thung a. A dik tak chuan a derin kan nung a, lem chang thiam thiam hi kan ngaisang emaw tih mai tur a ni a. Mahni nihna dik tak zahpui lova nungte hi chu kan ngaisang vak hauh lo va, chawimawina Nopui phei chu kan dawmtir reng reng lo. Hei hi khawvel hrehawmna pakhat chu a ni ngei mai. Tunlai khawvel buaipui pakhat chu lemchan hi a ni a, a tak en peih mang si lo hian a lem chu kan en peih hle si a nih hi.
Kan thih dawn darkarah chuan lemchang nun hi a bo vek tawh ang a, a takin kan nung tan tawh ang. Kan khum bulah chhung khat laina an inpun khawm rap rap ang a, "Mate, fian khat tal hi i la lem thei lo maw ?" min tih laih laih hunah chuan kan rilru leh kan nun dan chu a inmil thlap tawh ang. Chumi hunah meuh chuan chhandamna la chang lo kha a derin a thlamuang thei tawh dawn hauh lo va, a chang tawh lah chuan a hlau der thei hek lo vang a, tu nge ka nih tih chu a chiang tawh ang. Engtik niah emaw chuan thihna hian kan nun hi a la pawt chat ve dawn a, chumi hunah chuan kan thusawi tawp berah eng thu nge kan sawi ve ang? Chuta kan thusawi tur chu dâwt a tel thei tawh dawn lo va, Pathian leh mihring pawm tlak thu dik a ni hlen tawh ang. Chutiang thu dik chu kan sawi thut dawn avangin thu dik hlauhawm nge kan sawi dawn, thu dik lawmawm? Kan natna khum bulah chhung khat lainaten mittui parawl teuhva min en thap hunah chuan thu dik kan sawi hun a thleng tawh ang.
Bible-in, "Thih thlengin rinawmin lo awm rawh," tih thu min chah hi keini chuan hla duaia kan hriat avangin thih thlenga rinawm hi kan huphurh thin a. Nimahsela thih thlenga rinawm chhung hi a rei reng reng lo mai. A chhan chu mitthi vuinaah kal ila, "Heti theh thut hi a nih kan ring lo asin mawle," tih hi mitthi chhungte tawngkam a ni fo mai. Heta tang hian kan tum loh tawpin thihna kut vâwt hian min man thut thut thin tih hi a chiang a. Kan thih thut thut avang hian thih thlenga rinawm hi a hla hauh lo mai.
Mi pakhat a awm a, mi mawl tak leh hlauhawm tak a nih avangin tumahin an kawm duh lo va; nimahsela a ni chuan a hmuh fuh tawh phawt hi chu a kawm zel a. Khawvel ram hrang hrangah a zin kual a, tawng hrang hrangin thu a sawi thiam bawk a. A kal tawhna khuaah chuan miten amah an hlauh avangin awm ni an lo kham rup rup a, chutah chuan thu lungchhiatthlak tak a sawi ngei ngei thin a. A lenna in chhungah reng rengah chuan an pindante hi a thiatsak a, an khumte chu pawnah a theh chhuahsak lawp lawp mai a, tumahin an ti ve ngam si lo va. Thusawi lah chu a thiam lailêng khawp a, thu a sawi tawh chuan a ngaithlatute mittui hi a tla zung zung mai a, thenkhat an taphawm hawm bawk a. Thusawi thiam viau e ti lo chuan miten an haw em em hlawm a, haw em em chungin an kawm lo thei bawk si lo va. An khua a lo luh tawh hi chuan amah lawm nan Biak In dar hi khât ruihin an vaw bul vul a, chumi dar ri hriate chuan a lo thleng a ni tih hriain a thlenna in chu an rawn pan sup sup a. A lo thlen tawh chuan thusawi laklawh laite hi a rawn pawt chat hmawk hmawk a, lova fehte hi an hawng dawr dawr zel a. A hming chu THIHNA a ni.
He thihna taihbaiawm tak hian kan thusawi tawp ber tur chu a rawn tar lang ngei dawn a, chumi hunah chuan enge i sawi ve dawn?
WORSHIP PROGRAMME
Ni 16.12.2012 Pathianni zan atanga
Ni 23.12.2012 Pathianni zan thleng}
Damdawiin: Upa Lalrinliana Colbert
BMP HUANG
HRUAITU THAR THLAN
Vawiin chawhnu lam hian kum 2013 atana hruaitu thar tur thlanna BMP Fellowship Hall-ah neih tur a ni a, BMP Chanmari Unit member zawng zawngte chu inthlannaah hian tel vek i tum ang u.
HNATLANG
Kohhran Committee min ngenna tihlawhtlingin nimin Inrinni khan thutphah (bench) rawng hnawih hnatlang Biak in kawtah BMP-in kan thawk. Member engemaw zat kan thawk chhuak a ni.
ADVISER THAR
Kum 2013 chhunga BMP Chanmari Unit Senior Adviser atan Upa B. Vanhnuna chu Kohhran Committee chuan a ruat a, amah hi tuna kan Senior Adviser ni lai mek a ni.
ADVANCE CHRISTMAS
Nizan hmasa Zirtawp zan khan Fellowship Hall-ah Advance Christmas hlimawm tak hman a ni. Member kan kal tha e.
NOV. 2012 MONTHLY CONTRIBUTION
Bial 1 - Rs 200 Bial 2 - Nil Bial 3 - Rs 310
Bial 4 - Rs 680 Bial 5 - Rs 1020 Bial 6 - Nil
Bial 7 - Nil Bial 8 - Rs 570 Bial 9 - Nil
Bial10- Nil Bial11- Rs 430 Bial12- Rs 260
Bial13- Rs 140 Bial14- Rs 210 Bial15- Nil
Total - Rs. 3820
TUALCHHUNG KOHHRAN THU LEH HLA
Tarlan tawh angin tukin Sunday zing atang hian kan kohhranah Upa B. Lalthanliana hmangin Crusade neih a ni dawn. He Crusade hian kar khat chhung a awh dawn a, karleh Sunday zanah a tawp ang. Crusade-ah hian kohhran mipuite inkhawm zel tum thin ila, Crusade hlawhtling a nih theih nan Pathian hnenah i dil thin ang u.
Tukin inkhawm banah hian Sunday School lawmman hrang hrang sem a ni dawn a, lawmman dawng turte chuan i ngaihven ang u.
Vawiin chawhnu lam hian Fellowship hrang hrangten kum 2013 atana hruaitu thar thlanna an nei dawn. Hetiang hian inthlanna hmun tur theuh ruat a ni : KNP & TKP - Jubilee Hall-ah, BKHP - Biak inah, BMP - Fellowship Hall ah.
Kum thar 2013-a Sunday School kai tan hun chu January 13, 2013 Pathianni (Pawl siam rem ni) a ni. Hemi ni atang hian hming dah tur a ni ang a, hemi nia kal lo chu an kai kim thei lo tihna a ni ang.
Kum danga tih thin dan ang lo deuhvin kumin ‘Mas leh Kumthar’ ruai fatu tur hi a hrana inruat a ni a, mi 45 vel ruat an ni. Hetiang a nih avang hian fatu tura ruatte chu inthlahdah lova, a tawp thlenga hlen chhuak turin Kohhran Committee chuan a beiseiin a ngen a ni.
Editorial KAN TU LEH FATE MAWLH MAI HI
Tunlai khawvelah hian sualna a pung nasain kan hun hi a tha tawh lo em em a ni. Kan tu leh fate chenna leh an boruak tawn a ni miau si, kan tu leh fate hi kan ro hlu ber leh van thleng a kan chhawm theih awm chhun an ni a. In leh lo te, sum leh paite aiin an hlu zawk a, kan hmangaih zawk bawk a. Nimahsela, nu leh pate hian an tan hian kan nun leh hun hi kan pe tlem lutuk a ni lo maw?
Zu leh ruihhlo - kan thalaite leh naupangte hruaisual a, tikhawlo thei a tam em em mai si a, heng avanga kan tu leh fate kan hloh chuan ava pawi dawn em! Tu mawhphurh nge ni ta ang le. Kan tu leh fate nun venhim leh nun kawng dik kawhhmuh hi nu leh pate hna (duty) pawimawh ber a ni. Kan fate theuh hi i ngaihvenin an tan hun tam zawk i pe ang u, kan inchhira a tlai luat hma hian. Kan thu an awih theih lai hian Pathian thu taka enkawl leh kohhran lama hruai luh hi kan fate enkawl nan chuan a tha ber ang. Beidawng lovin nasa lehzuala tawngtaiin kan fate hi kaihruai ila, lawmna leh hahchawlhna min thlen ngei ang. Tun atang hian tan i la thar theuh ang u.
LAWRKHAWM
1. Sikkim Area Baptist inkhawmpui chu ni 14.12.2012 Zirtawpni atang khan neih a ni a, vawiin Pathianni thleng a awh ang. Ringthar Baptisma chang engmawzat an awm a ni.
2. Birpara-ah ZBMS Gospel Meeting neih mek a ni.
3. Naktuk Thawhtan leh Thawhleh ni hian Rabha RBCU-a Evangelist-te leh an nupui te chu Rev. F. Ramdinmawia, Regional Director (Guwahati) hovin Retreat an nei dawn. An senso atan hian BCM Lunglawn chuan Rs. 20000/- an pe.
4. December 18, 2012 atang hian Tripura Dulukma kohhranah Salvation Camping an nei dawn a, anmahni atangin Speaker tur chu an inruat. Camp senso tur atan BCM Lunglawn chuan Rs. 30000 an an tumsak. Lunglawn kohhran te inpekna hi a ropuiiin an entawn tlak hle thin mai.
5. Missionary damlo kan tarlan thinte khan that lam pan zelin thenkhat chuan damdawiin an chhuahsan tawh a. Tv. Lalfamkima chu a chenna in Chanmari Pastor Bial quarter-ah a la awm mek.. Tv. Laltlankima pawhin tunah chuan Aizawl thleng tawhin Nl. Zoramthangi pawh niminpiah khan a rawn haw ve tawh bawk. Hriselna tha an neih theih nan i tawngtaipui zel ang u.
6. Lehkhabu hlu leh rotling ‘Zo fate Chanchin Tha rawn thlentute’ tih Rev. Dr. PL. Lianzuala ziak chu tlangzarh a ni ta e. Lei theihin a awm tawh a, Rs. 500/- man a ni.
CHANCHINBU I HMANG TANGKAI ANG U - RSZ
Kan kohhran chanchin hriat theihna leh chanvo inhriattirna pawimawh tak pahnihte chu BMP ENTU leh THALAI KANTU te hi an ni. BMP Entu-ah hian Kohhran Worship Programme te, Sunday School Report te, BKHP leh BMP programme te tihchhuah a ni thin a. Tualchhung kohhran hriattirna pawimawh tak takte leh Mission News tharlam leh pawimawh, tawngtainaa kan hriat turte tarlan reng a ni a, Sermon leh Article tha tak tak chhiar tur a awm reng a, Kohhran Ni Pawimawh (BCM Special Day/Sunday) thu khawchangte tihchhuah thin a ni bawk. Thalai Kantu chanchinbuah chuan Zing Tawngtai hruaitu tur te, Biak ina pangpar khawitu te, KNP, Jr. TKP leh TKP programme te tarlan a ni thin. Unit TKP leh Group chanchin hriattirna bakah Sermon/Article tha tak tak chhuah a ni thin bawk.Heng chanchinbute hi chhiar uar ila, i beng a lo var ang a, i che buai lovang.
Kohhran chanchinbu dang Baptist Today te, Missionary Tlangau te, Kohhran Beng te, Loisi leh Thalai Entu te hi chhiar thin la, i hriatna a lo zau ang a, rual i lo pawl ang a, i inchhir lo vang.
Chanchinbu chhiar tam la, hmang tangkai rawh.
THUSAWI ROPUITE
1. Naupang leh Pathian inkarah nu leh pa an awm a, inzawmtirtu an nih loh vek chuan a daidangtu tal an ni thin. - Abigail Van Buren
2. I fa avanga i tah hun a thlen hma ngei hian naupang chu vel mai rawh. - The Arabic Proverb
3. Mi tupawhin nu, Pathian ngaihsak mi a neih chuan a rethei ngai lovang. - Abraham Lincoln
4. Mi hlawhtling kan tihte phenah hian nu ber chau takin an lo awm chawk thi. - Gary Inrig.
PATHIAN RAM THILPEK (DEC. 2012)
BCM CHANMARI LUNGLEIPRZ - Rs. 3,06,630.
RT - Rs. 2,27,070.
BFT - Rs. 59,550.
Bilding - Rs. 3,65,280.
Tualchhung - Rs. 2,79,465.
K’mas & K’thar - Rs. 19,520.
Mission Fund - Rs. 14,150.
TOTAL - Rs. 12,71,665.
Thawhtu chhungkua - 343
No comments:
Post a Comment